Se datang bawa cinta, kasih manyala beta pung hati yang su pernah galap macam malam yang seng ada bulan deng bintang
Rasa nyaman yang se kase biking beta pung akal lari ilang, karena beta seng tau, ini yang orang bilang nyaman kah jebakan?
Se pung senyum tipis-tipis, tatapan tajam macam silet deng rayuan yang pono deng gombalan biking beta tidur malam seng bisa sono
ADVERTISEMENT
SCROLL TO RESUME CONTENT
Se kase kolaborasi romantisme deng bucinisasi yang kase lahir ‘alainisasi’ diantara tong dua pung kisah
Tong dua bangun kisah macam papa deng mama bangun rumah tangga
Mar tangga yang tong dua bangun su patah
Se datang bawa harapan, se kasih yakin beta macam beta yakin beta pung tuhan
Baru se pigi bawa semua kenangan, kase tinggal janji deng harapan
Se bukan hanya datang kase cinta tapi se juga datang kase luka
Se kase janji di beta waktu itu
“nona e tunggu beta bale” padahal se pi bale deng orang lain
se pung janji macam hayati kase janji di zainuddin, mar samua kosong dobol
Mungkin se pung perasaan su luntur
Karena su ada yang lebe kas nyaman se di setiap waktu, dibandingkan beta yang cuman tunggu kepastian yang seng menentu
Se kase beta luka tinis luka sebab kalo se cinta seng mungkin se kase dusta
Nyong e.. Dangke banya so pernah datang kasi manyala api cinta,, walaupun nanti se sandiri yang siram kase mati deng air mata
Ini setia kah setingan ?
Karena se pilih dia yang selalu kase nyaman,, bukan beta yang selama ini setia tunggu deng harapan.
Penulis : Sulistiani Sapsuha
